එය මගේ වරදක්
නොවේ - ස්වාමීනී
ඇගේ කැමැත්තයි දෙවියන් වහන්සේගේ
'කැමැත්ත'
වූයේ...
එය මැ විය යුතු මනා ය
නීතියේ 'කැමැත්ත' ද

වැහි වැටි මොහොත
උණුසුම් රාත්‍රිය
මා නොවේ වරදකරු
ඒ දවස ම ය

එනමුත් පෙම්වත
වැහි පීලි දිගේ
උසාවියෙන් එපිට
ගලන්නේ
රුධිරය යි
රතු ම
රතු

වරද කා අත
කියනු මැන
ඔබ මැ

"ඇය යි මා සමඟ ආවේ
ඇය යි මට ආදරය කීවේ"

"එසේ ය සබඳ
ඔබ නිවැරදි ය.
මම යි ඔබ සමඟ ආවේ
මම යි ඔබට ආදරය කීවේ"
මා ඔහුට කීවේ ආදරය බව
සැබෑවෙනුත් සැබෑවක් ය
ස්වාමීනී

'ලකුණු කර ගනු මැනව
ඇගේ කැමැත්ත ය
නීතියේ කැමැත්ත'

නීතියේ කැමැත්තට
අනුව-
ඈ වනසා දැමූ හෙයින්
විත්තිකරු වන යුෂ්මතණන්
අතිපාරිශුද්ධවන්තයෙකු ලෙස
යෝජනා කරමු.

එකී යෝජනාව
සමාජ සම්මත
කරමු

අවසානයි
උසාවි වාරය

නැත. නැත..
එහෙත්
අවසන්ව නැත
පාරිශුද්ධ ඔබේ
දූෂිත පෙම්වතියගේ
හදවතින ගලන රුධිරය.