Saturday, October 31, 2020

කන්දක් ගැන ලිවිය හැක මට

 
















රෝස මල් නැති නිසා මෙහි 
රෝස මල් ගැන ලිවිය නොහැකිය මට
මිටියාවත් නැති නිසා මෙහි 
මිටියාවත් ගැන ලිවිය නොහැකිය 
එහෙත් ඔබ මා පෙළන හැමවිට 
කන්දක් ගැන ලිවිය හැක මට

තලා මා, අත ඇති සියලු අවියෙන 
බලා ඔබ, දාහයෙන් පෙළී ඇවිලෙන  
ඔබ ගැනම බිය දැනෙයි මට 
බිළින්දෙකු වී ඔබ මා අත 
සිටින්නට ඇති තරම, සසරක දුර

එවන් විට මෙන්, දැවෙන හිත ගෙන අත්ලට 
මඩින්නට නොහැක සිලිලාර ඉසිමින 
අප අතර කිසි ඇසුරක් නැති කොට 
අතර ඔබ හැටිය දැන පල නෙලන අන් දන 
 
හදැසුරට කිසිවෙකුත් නොඈඳෙන 
'මුත් සියක් දන පිරිවරාගෙන 
කල්පයක දුක දරාගෙන 
කන්දක් නොවෙයි පරිණාමය 
බලන්න අර දෙබෑවුම 
බිඳී ඇති හැටි නායෙන.

Picture - Kenro Izu

Saturday, October 17, 2020

සොයමින් මොක් සුව වනයෙහි


මා වසා සිටි කන්ද දැන් නැත
බිඳී ගොස් එළි පුඤ්ජ තැන තැන
අසමාන කොටසින් බෙදී ගිය
සමචතුරස්‍රයක් සදිසි මගෙ සිත

බිල් ගෙවීමත් බඩු ගැනීමත් අඩුපාඩු බැර වී තිබීමත්
අඩක් නිම වූ ගෙදර වැඩ සහ ගෙඋයනෙහි තණකොළ වැවීමත්
කාරයෙන් යම් හඬක් ඒමත් එයට නිසි පිළියම් යෙදීමත්
ළමයින්ගෙ ළඟ එන විභාගත් ගෙදර වැඩ හා පන්ති යාමත්!
පිරී එම අසමාන ඉඩ කඩ, තෙරපමින් ඇත ඇවිදිමින් හිත

එවන් කිසිවක් පිරී නොතිබුණු
යාන වාහන පවා නොතිබුණු
වැළඳ පැටි විය හා යොවුන් විය
නිරුවත් දෙපයින් ඇවිදිමි
ලැබෙන එකම තත්පරයක
සොයමින් මොක් සුව වනයෙහි

- ෂසිකා අමාලි මුණසිංහ
Painting: Robert Hagan, Australia

රදල කත

සියවසකට එහා මිය ගිය රදල කතකගෙ රුවක් අලවා තම මුහුණු පොත් මත ගරහනු දුටිමි පිරිමි ජන සමූහය රෙදිවලින් පොරවා නියමිතව තිබු එකල බරණ ගවසා නියමිතව තිබු එකල ඇය හිඳී බැල්මකිනිදු විරතව එකලු සේයාරුවක් පිණිස නියමිතව තිබු පරිදි රෙදි පිළි යටින් ආවරණ තිබිණිද හදවතක් ඈ වෙත? එ'හදවත මත රහසේම මතුවන කඳුළු ගුලියක් දැනේ මා වෙත ෂසිකා අමාලි මුණසිංහ

Thursday, October 15, 2020

කතා කිරීමට පවා පෙරාතුව

 


මට දුරකථනයක් ලැබෙන විට
ඔබ නික්ම ගොස් අහවරය 
පාලුවෙන් හිරි වැටී ආත්මය
වියැළි පත් සුළඟට ඔහේ ගසා ගිය
උදා හා සන්ධ්‍යා සමයන්
මා පසු කර ඇවිද ගියා හෙමින්
කතා කිරීමට පවා පෙරාතුව 

නයාගේ ක්‍රීඩාව නොනවතා කෙළිමින්
නයාට නයාවම හැපෙන තෙක්
ගන කලුවර පවා නොතකමින් කුටියෙහි
ගත කළෙමි අනන්ත වූ රාත්‍රීන්

යතුරු පුවරුවක් මත මා
කැරකෙමින් සිටින අතරතුර
කඳු වළලු මත පිපුණි මුසෙන්දාස් කුසුමන්
නිසා නුබ ගැබ දිලුණි යෝග තාරකාවන්

- ෂසිකා අමාලි මුණසිංහ
Painting: Odo Dobrowolski (Polish, 1883-1917): Woman at a Window, c.1910.

නත්තල් සීයා සහ අකුරු කියවීම

සීයා යනෙන තැන සීයාගේ පසුපස යාමට එකල මා ප්‍රසිද්ධ වී තිබිණ. සීයාද යනෙන තැන මා කැටුව ගියේ විරෝධයක් නො පාමිනි. ඒ අනුව, සති දෙකකට වරක් නොවරදවා සීයා සමඟ නගරයේ ඉරිදා පොළට යාමට පවා මම අමතක නොකළෙමි.

සීයාට ඥාති පුත්‍රයෙකුගේ අකුරු කියැවීමකට ආරාධනයක් ලැබුණේ මේ දිනවලය. ඉදිකට්ට පසුපස නූල සේ සීයා පසුපස ඇදෙන මමද එහි යාමට සැරසුණෙමි. "යන ගමන් හන්දියේ කඩයෙන් මොනව හරි අරගෙන යනවා." සීයා ආච්චිට කියනු ඇසිණ.

උදෑසනම අපි එහි යාමට පටන් ගතිමු. අපගේ ගෙදර සිට හන්දියේ කඩයට යාමට පැය භාගයක්වත් ගත වේ. තුන්මං හන්දියේ පිහිටා ඇති කඩය තුළට සීයා සමඟ මමද ඇතුළු වීමු. ගෙදරට විස්කෝතු පැකැට්ටුවක්, කෙසෙල් ඇවරියක් කාරිය ගත් සීයා අවසන කුඩා දරුවාට තෑග්ගක් තෝරන්නට විය. සීයාට උවමනා වූයේ දරුවාට පොත් කට්ටලයක්, පැන්සල් පෙට්ටියක් ගැනීමටය. 

ඒත්, පොත් පැන්සල්වලට ඉහළින්, නූලක එල්ලී ගත්, නත්තල් සීයලා නටමින් සිටියහ. 'අනේ, මා රැගෙන යන්නැ'යි සිනාසෙමින් එල්ලී සිටින නත්තල් සීයාව මා නෙත ගැටුණේ කඩයට ඇතුළු වෙද්දීමය. නත්තල් සීයලා සුළඟ සමඟ රවුමට රවුමට කැරකෙමින් නටමින් සිටියහ.

අහා! එය කවර පියකරු දසුනක්ද? නත්තල් සීයාගේ ඇඳුම රතු පැහැ වූ අතර ඔහු උරයෙහි තෑගි මල්ලක් විය. මේ අකුරු කියවීමකට හරියනම තෑග්ගය. බලන්න, නත්තල් සීයාගේ ලස්සන! රන්වන් කෙස් වසා ඇති තොප්පිය! මුදලාලි මාමා සැණෙකින් නත්තල් සීයා මා අත තැබීය. රබර්වලින් සාදා තිබූ එය අවැසි නම්, එහෙටත් මෙහෙටත් අදින්නටද හැකි විය.

"සීයේ, මේක තමයි හරියනම තෑග්ග. අපි ඒක ගෙනියමු." 

මම සීයාට කීවෙමි. සීයා එය නොතැකුවේ, "නත්තල් සීයල හොඳයි නත්තලට" කියමිනි.

"ඒ වුණාට සීයේ, නත්තල් සීයා තමයි හොඳම" සීයාට එය තේරෙන බවක් නොපෙනිණ. සීයා නත්තල් සීයා ගැන දන්නවා මදි වෙන්නටද පුළුවන. නැතිනම්, රබර්වලින් තැනූ මෙ'කදිම නත්තල් සීයාව එපා කියන්නේ නැත.

නත්තල් සීයා පිළිබඳ නොයෙකුත් චිත්‍ර මම ළමා පුවත්පත්වලින් දැක තිබුණෙමි. ඒ හැම චිත්‍රයකම, මේ නත්තල් සීයා වාගේම, නත්තල් සීයා තෑගි මල්ලක් උරින් එල්ලාගෙන සිනාසෙමින් සිටියේය.

හැම නත්තලකදීම, නත්තල් සීයා තෑගි ගෙන එතැයි මම මඟ බලා සිටියේ, නත්තල් දා රෑ, නත්තල් සීයලා තෑගි ගෙන 'විත් ගෙදර තබා යන බව අම්මා කියා තිබූ නිසාය. නත්තල් සීයා හරියටම නත්තල් දා රෑ දොළහට එන බව මම සිතා සිටියෙමි. නත්තල් දා, රෑ කල නොනවත්වා වැයෙන ගල් ඔයෙහි මුණු මුණුවත් නිශා කල නිසල බව පාරමින් ඇසෙන විහඟ පියාසැරියත් අතර,නත්තල් සීයාගේ යානයේ සීනු හඬ දැන් දැන් ඇසෙතැයි කන් යොමා සිටි මට, හැමදාමත් ඒ හඬ නො ඇසී ගියේ ඊට පෙර නින්ද ගිය බැවිනි. 

ඒත්, හැම නත්තලකම පාන්දරින් නැගිට, ගෙයි ඉදිරිපිට දොරකඩ වෙත දිව ගොස්, තෑගි තිබේදැයි පරික්ෂා කිරීමට මම අමතක නොකළෙමි. එහෙත්, කිසිවිටෙක තෑග්ගක් මුණ නොගැසුණේ නින්ද යෑම නිසා විය යුතුය. එක දිනෙක විතරක්, තරමක් ලොකු මිනිරන් කැබැල්ලක් එහි තිබූ අතර, එම දිදුලන මිනිරන් කැබැල්ල ඇහිඳගත් මම එය පරිස්සමට ආච්චිගේ ඇඳුම් පෙට්ටිය ඇතුළට බහා තැබීමි.

මා නත්තල් සීයාව වඩ වඩා තුරුලු කර ගත්තෙන්, එය නැවත ලබා ගැනීම මුදලාලි මාමටත් සීයාටත් කළ නොහැක්කක් විය. "ආයෙත් නං එක්කන් එන් නෑ" සීයා විරෝධය පෑවේය. ඒත් ඉතින් හොඳම නම් නත්තල් සීයාය. අකුරු කියවන ළමයෙකුට හොඳටම හොඳය. නත්තල් සීයාව ළඟ තියාගෙනම අකුරු කියැවිය හැක. අවසානයේ සීයාට පොත් පැන්සල් ගන්නට නොහැකි වූ අතර, අපි නත්තල් සීයාව මිල දී ගතිමු.

සීයා කතා නොකර තරහෙන් ඉදිරියට ඇදෙන්නට වූ අතර, නත්තල් සීයා තුරුලු කර ගත් මා සීයා පසුපස දිවයමින් සිටියේ හිම යානයක නැඟී යන්නාක් පරිද්දෙනි. මහ පාරෙහිද අතුරු පාරවලද සතුටින් උඩ පනිමින් නෑ ගෙදර ගිය මම, සීයා රවද්දීම, එම මහාර්ඝ  වස්තුව කුඩා ඥාති සහෝදරයා වෙත පිරිනැමුවෙමි. 

- ෂසිකා අමාලි මුණසිංහ

Painting: https://www.pinterest.com/pin/722475965194140163/ Sierra Missouri

Wednesday, October 14, 2020

බෝල්ෂෙවික් විප්ලවය අපෙ ගෙදර

මොන්ටිසෝරි බසයේ නලා හඬ නාද වන තුරු
බෝල්ෂෙවික් විප්ලවය අපෙ ගෙදර
බයිකල් විලෙන් පැන සයිකල් පදින අස්සයො
ඒන්ජල් ඇල්ල මෙන් කැලඹවෙන ජල බේසම
ආක්ටික් වගෙ ඝනීභවනය වී ගෙන
දත් ටික මැදෙන්නෙම ටීකා කියාගෙන

අයිස් කැට පෙට්ටිය ගමනකිය කෑම පෙට්ටියේ
ගෙදර ඉන්නට පාලු කිතුල් ඇටයෙකි සාක්කුවේ
පෙඳ පාසි පොත් අතර ඇමසන් වනය මාරුතේ
පන්තියට යන අරගලය ගේට්ටුවෙ එල්ලී ඇතේ

බෝල්ෂෙවික් විප්ලවය අපෙ ගෙදර

- ෂසිකා අමාලි මුණසිංහ

https://epaper.dinamina.lk/Home/ShareArticle...

Saturday, October 10, 2020

ඩැන්ඩිලියොන් කුසුම




















ප්‍රේමයේ මුනිවර චාරිකාවන් අතර
සුමට කුසුමක ලෙද පිපී ඇත ඔබ
ඔබ ඇවිද යන හඬ ඇසේ මට
අල්තාරය වෙත
ඔබ ප්‍රේමයේ දෙවඟනකව සිටියදී
දෙවියන් කොතරම් අන්ධදැයි
කල්පනා කරමි මම

වියරණ දොසක් පවා නොමැතිව
සෙව්වන්දියක ලෙද පිපී කඳු නිම්නෙක
වයයි ඔබ සන්තාන ගීතිකාවක පද
පෙම මතුර ගල්වා සුමිහිරිව
වැතිර තනු අතර ඔබ සුමුදු හද මිහිර
ගලා යන අතර නිම්නයෙන් නිම්නයට
දෙවියන් කොතරම් බිහිරිදැයි
කල්පනා කරමි මම

අඳ බිහිරි දෙවියන් අතර
විප්‍රවාසී විශ්වාසයක ගැලී නොගැලී
අසම්පූර්ණ ලොවක පරිපූර්ණත්වය
හුදෙකලා කළ බැවින් ඩැන්ඩිලියොන් කුසුම
දෙවිඳ, ඔබ හඬද, නොහඬවනු මැන

Shasika Amali Munasinghe

Painting: "The Valley of Arconville", c. 1887, By Theodore Robinson, American painter best known for his Impressionist landscapes (1852-1896)

Friday, October 9, 2020

ඕතමය















ඔබ මට කවියක් ලියන්නට කීවෙහිය
මම ඔබ වෙනුවෙන් සිතුවමක් ඇඳීමි

තුරුපත් එකින් එක ගිලිහ යන විට
ඔබට බැරි ඇයි දැන් නටන්නට..?

'පෙම්වත
රැළි ගවුම නොසොල්වාම
මම ගයන්නෙමි ඔබ වෙනුවෙන්
සිතාරය තත් බිඳිමින්..'

ඵලක් වේ නම් මිහිරිතම තුර
පෙමක් මිස අන් කිසිවකිද ලොව?
දැලක් ලා වළකන්න හැකි වෙද
සුළඟ හෝ නල දැවටි සුසුවඳ?

සුජාතා


ඇරුණු අඩවන් දෑස පිසිමින් බත් උයනවද සුජාතා   
වැඩට යන කණිසමට කලියෙන් බත් බඳිනවද සුජාතා   
මැදපු කලිසන් කමිස පේළිය ඇඳ උඩද තව සුජාතා   
හැඩට ඉන්නට වෙලාවක් නැති තරං වැඩ ඇති සුජාතා 

වැව්ව ගස් ටික දියෙන් නහවා ගෙතුළටම වන් සුජාතා 
වැස්ස එන්නට කලින් රෙදි ටික ගන්නවද ගෙට සුජාතා 
ඇත්තටම ඇඟපතේ තැවුලට නුරුස්නාවද සුජාතා
ඇඳට වැටුණේ රැයේ මැදියම හුස්ම නැතිවද සුජාතා 

අයින් වී ජොබ් එකෙන් නිති පවුලටම කැපවුණු සුජාතා 
සබන් පෙණ මැද ඔට්ටු අල්ලයි උදේ වරුවම සුජාතා
ළයින් බැඳි පෙම නොදැනෙනා බව කියූ හිමි හිමි සුජාතා 
ඉතින් දැන් ඇති තරං බැඳි බත්, පිට උගුරෙ යයි සුජාතා

Shasika Amali Munasinghe
Painting: Sir Edward Burne-JonesEnglish, 1833 - 1898 Desiderium

Wednesday, October 7, 2020

දේදුන්න

 


හුස්ම හිරවෙන මොහොත

වලාකුළු බිඳකුදු නොමැති තරමට
කඳු මත අහස නිරාවරණය
අලස ගමනින් පියඹන සියොත් කැල
වියැක යයි සාමාන්‍ය දසුනක් මෙන් මිහිදුමෙහි
සෑම වර්ණයක්ම එකට එක්වුණු
කලු පැහැයකි ගන විල්ලුව
ප්‍රකෘතිය වසා දත් විළිස්සන
මිනී කඳුකර පාමුල
මට
හුස්ම ගන්නට නො හැකිය

හතිය මා පපුතුර දවයි
දාගැබ් බඳු හදවත් පුපුරා වැටෙයි
දුලා නුඹ වත පවා
අන්ධකාරයකින් සඟවයි

තුවක්කුවක් තැබු විට හිසට
හුස්ම හිරවෙන මොහොත
සැබෑ මිනිසෙකුට එදිරිව දිවුරමින්
සැබෑ නොවනා සාක්කි දෙන මොහොත
ගෙල සිරකර දණින්, වැලමිටින්
දෙණ විසි කර දමන මොහොත!
එහෙව් මොහොතක මා බිඳුණු හදවත මිනිස,
මස් වැදැල්ලකි, ඔබට

ඉරුදිනී

 



නිවස


මා දන්නවා මේ නිවස

උණුසුමැති සිසිලස මැද නිවස්නා

සිලි සිලි සිලිලාර මැද

මියු මියු හඬ නඟන'තර වස්දඬු 

වනගුල්ම අතරමඟ තැනෙක 

වැළලූ හදවතෙහි දලු රිකිලි මත

සමනල ගෙතුම් ඇති ශ්වේත වන මල

සසරෙහි හුරුපුරුදු සුවඳ!


Picture - Postcard Hotel 

Tuesday, October 6, 2020

Ministry of Success, පූස් වලිග සහ සෝවාන් වීම


මං ආවෙ කැට් ස්ටෝරි එකට. මට ඕන වෙලා තිබුණා පූස් වලිගයක් මිලට ගන්න. උස ගොඩනැඟිලි අස්සෙන් වැටිල තිබුණ, වික්ටෝරියා පටු මඟ දිගේ ඇවිදගෙන එන අතරෙ මං හිතුවෙ සුදු පාට සෙරමික් වලිගයක්ද අලු පාට එකක්ද තෝරගන්න ඕන කියල.
ඒක ලස්සන උදෑසනක් හිරු එළිය වික්ටෝරියා පටුමඟේ පුස්තකාලයේ වීදුරු ජනේලවලට වැටිල දිලිසෙමින් තිබුණෙ. මන් ඒක පහු කරන් ග්‍රෑන්ඩ් පැසිෆික් හෝටලය ඉස්සරහින් සුදු ඉර පනින්න හදනකොටයි දැක්කෙ, ෂේන්යා ලොබියට වෙලා පත්තරයක් පෙරළනව.
මං දැක්ක හැටියෙ, ඇගේ ඇස් දෙක විස්මයෙන් ලොකු වුණා බළල් තඩියෙක්ගෙ වටකුරු ඇස් දෙකක් වගේ. කැරට් බීම එකක් බොන්න ඕනෑ වගේ මමත් පැසිෆික් සාගරේට ඇතුළු වෙලා සැප පහසු පුටුවක කිමිදුණා.
"මං ඔයාටයි මටයි දෙන්නටම හරියන දෙයක් හොයාගත්තා" ෂේන්යා කිව්වා.
"කොහොමද නෙක්ස්ට් ජෙන් ගව් චැම්පියන් කෙනෙක් වෙන එක"
"කොහොමද ඒ?" මං ඇහුවා.
ඇය කියවන්න ගත්ත ලතාවට, අත තිබූ පත්තරේ දිහා බලාගෙනම.
"ඇරෙ යොඋ අ පුබ්ලිc ඔෆ්ෆිcඉඅල් ව්හො වන්ට්ස් ටො මකෙ අ චන්ගෙ? ‍යොඋ cඅන් බෙcඔමෙ අ නෙxට්ගෙන්ගොව් චම්පිඔන් ඉන් ඡියන්ගෞව්"
"ආව්, අයෑම් අ පබ්ලික් සර්වන්ට් ඇන්ඩ් අයි වෝන්ට් වු මේක් අ චේන්ජ්" මම කිව්වා.
සාගරයේ අනිත් පැත්තට ඇවිදලා අපි කැරට් බීම දෙකක් ඉල්ලුවා. ඒක එන්න විනාඩි තිහක් විතර යන අතරේ අපි දෙන්නා ෆෝන් එකෙන්ම ඉල්ලුම්පත පුරවන්න ගත්තා. මගෙ හිත නිකං උඩ පැන පැන තිබුණෙ වොලිබෝල් චැම්පියන් කෙනෙක් වගේ. මට ඒ විදිහට පූස් වලිග අමතක වෙලාම ගියා.
මුලින්ම තිබුණෙ ඔබ ගැන විස්තරේ ලියන්න.
"මම පා ඕ. හරියට සමනල පෙත්තක් වගේ. හුළඟක් ආවොත් ගහගෙන යන්න පුළුවන්. ඒත් හරියටම ගහගෙන යන්නෙත් සංදර්ශනයක් වගේ.."
ඊට පස්සෙ දිගටම ලියන්නයි තිබුණෙ. සේවා කාලයේ සාර්ථක වූ අවස්ථා, අසාර්ථක වූ අවස්ථා, අසාර්ථක වීමට හේතු, උගත් පාඩම් වගේ ඒවා..
"අසාර්ථක වීමයි අසාර්ථක කිරීමයි එකක්ද දෙකක්ද?" ෂේන්යා ඇහුවා. අපි දෙන්නා මූණට මූණ බලාගත්තා.
ශේන්යාත් මාත් වැඩ කළේ චියැංගෝවේ එකම ඔෆීසියක. අපි එන කාලෙ ඒක තිබුණෙ සිල්ලර කඩයක් වගේ. එතැන වැඩ කරන අය පඩිත් ගන්නව, ෆයිල් එකෙන් එකට සල්ලිත් ගන්නවා. ගෙදර යන්නෙ පොළේ ගියා වගේ. එක එක්කෙනා තම තමන්ගේ වැඩ කරගන්න තේ, කෝපි, රසකැවිලි, සාරි, අයිසින් කේක්, දූරියන්, වෙරළු, නෙල්ලි පවා ගෙනත් දෙනවා. අතිනුත් ගෙනත් දෙනවා බඩු බෙදන්නන් අතෙත් එවනවා.
"ඕව ලියල වැඩක් නෑ. තියෙන නඩු මදිවට තවත් ඒවා වැටෙයි" ෂේන්යා කියනවා.
ලාවට දෙහි දැමූ කැරට් බීම තොල ගෑවත්, ඒසී කාමරේ තාප ශක්තිය වැඩි වෙලා වගේ දැනෙනවා.
"දැන් තියෙන්නෙ උගත් පාඩම් ලියන්න" ෂේන්යා කියනවා.
"රාජ්‍ය සේවයේ සේවයක් කියල දෙයක් කරන්න කොච්චර නං අමාරුද කියල තමයි අපි ඉගෙන ගත්තෙ" ඈ ම කියනවා.
මේක අත ඇරල පූස් වලිගෙ ගන්න ගියානම් හොඳය කියල ඒ ගමන මට හිතෙනවා.
ඊළඟට අහනවා විනය පරීක්ෂණ තියෙනවද කියල. වෙනස කිරීමත් එක්ක බැඳුණු ආතල්ම සීන් එක ඒක බව චියැංගෝවේ කවුරුත් දන්නවා.
"මේකට ඇප්ලයි කරන්නෙ ලොක්කා හරහ නෙමෙයිනෙ. පොඩි ලොක්කව දැනුවත් කරාම ඇති කියලත් තියෙනවා. පොඩි ලොක්කව දැනුවත් කළාද කියල ඊළඟ ප්‍රශ්නෙන් අහනවා.
"චැම්පියන් කෙනෙක් වෙන්න නං මට විතරක් කියල බෑ, ලොක්කගෙන් අවසර ගන්න වෙයි" පොඩි ලොක්ක කියනව.
චියැංගෝවේ එහෙමයි. අර පුරාණ කතාවල එන දෙවිවරුන්ට අමතරව, ආයතන ප්‍රධානී ලොක්කා කියල දෙවි කෙනෙක් ඉන්නවා. එයාට අපට විරුද්ධව ඕනෑ දෙයක් කරන්න පුළුවන්. තප්පරයෙනුත් කාලක් විතර එහෙම දෙයකට යන්නෙ. කරපු වැරැද්ද හරි ගස්සන්න අපි අවුරුදු ගණන් නඩු කියන්න ඕනි. ගෑනු වුණත් පිරිමි වුණත් එයාලට ඉන්නවා අන්තඃ පුර. අන්තඃපුරය ලොක්කව නාවනවා, දෙපා දොවනවා, කවනවා, පොවනවා, සුවඳ ඉහිනවා. ඔය තමා ඉතිං ප්‍රධාන රාජකාරි. ඒකනේ මේ රටට චියැංගෝව කියන්නෙ.
"දැන් මේකට ඇප්ලයි කරන්න පුළුවන් ලොක්ක කැමති නං විතරයි. ලොක්ක කැමති නෑ. ඇප්ලයි කරන්නත් බෑ. සරලයි." මම ෂේන්යාට කිවුවා.
"මේ ඇඩ් එක මේ විදිහට වෙනස් වෙන්න ඕනි." ෂේන්යා කිව්වා.
"කොහොමද?" මම ඇහුවා.
"ඔබ වෙනසක් කරන්න කැමති , ආයතන ප්‍රධානියාගේ ආශිර්වාදය ලත්, රාජ්‍ය සේවකයෙක්ද? කියල."
"කැරට් වෙනුවට සැර මොකුත් නැද්ද?" මං ෂේන්යාගෙන් ඇහුවා.
"ම්-හු" ෂේන්යා කිව්වා.
දැන් දවල් වෙලා. වික්ටෝරියා පටුමඟ අවු රැස්වලින් නෑවිලා. පුස්තකාලෙ වහලය දිස්නෙ දෙනවා ඈතට. හ්ම්, මං කැමති පුස්තකාලෙ බකමූණට.
"රස්සාව මාරු කරන්න ඕනි. මට දැන් ඇති වෙලා"
ඊළඟට අපි ජොබ් පිටුවට ගියා.
"ආ.. මෙන්න, ජජස්ලා ඉල්ලනවා. මං ඇප්ලයි කරන්නෙ ලොක්කිට පේන්න, පේන්න" මං කිව්වා.
"අම්මො, මට නං බෑ, පොස්ට්-මොර්ටෙම් තියන්න" ෂේන්යා කිව්වා.
"හ්ම්, මං හිතන්නෙ, මං දැන් පූස් වලිගයක් තෝරන්න ගියොත් හොඳයි.." මං පැසිෆික්වලින් එළියට බැස්සා. ෂේන්යා හිනා වෙවී එතැනම හිටියා.
දැන් මට පුළුවන් පූස් වලිගෙත් අරන් මූද පැත්තට යන්න. සුළඟ අරගෙන එන සුවඳ විඳගන්න.
මං මුහුද ළඟ බිම වාඩි වෙලා ෂේන්යාට කතා කළා.
"අපට පුළුවන් ලොක්කගෙ පර්මිසන් නැතුව සෝවාන් වෙන්න."
"ඔවු, අපි සෝවාන් වෙමු."
අපි හිනා වුණා. මඳ සුළඟ, සුවඳ එක්ක ඈතටම ඇදුණා.

ෂසිකා අමාලි මුණසිංහ
Photo Source: blog.opentable.com