Thursday, December 20, 2018

වසන්ත සෘතුව වෙත



වසන්ත සෘතුව වෙත
වර්ෂයක් හිමි නැත
එහෙත් මල් මෙන් පත්ය හැම තැන
සිසිරයේ හිම මල්ය සුළඟ හා පැන යන

Picture - Ada Shulz, American, 1870 - 1928, "Iris Garden"

දුහුවිලි



ඇතැම් අය
ගෙමිදුල් අතු ගාන විට
දුහුවිලි හැරේ
ඔවුන් වෙතටම

Picture - Janice Allmon, American, Born 1950, "Climbing Vines"

Wednesday, December 12, 2018

රන් වන් රන් යතුරු කැරලි



මැදී දිස්න දෙන රන්වන්
යතුරු කැරලි හුරු පුරුදුය
පතා ඇවිද යමි සුපුරුදු
සෙනෙහෙබරිත වැළඳගැනුම

මේ විශාල වේදනාව
මේ විශාල බියකරු බව
අත් ඇතැරුණු හිස්කම මත
දැරුමට හැකිවෙද, නොහැකිව
අහුමුලු මත වැතිර වැතිර
දීර්ඝ වෙයි,

කඩතොලු මත පා තබමින්
මඳ අඳුරෙහි දියව දියව
සුපුරුදු වුණු සඳ එළියෙහි
සෙමින් විවර කරමි කවුළු
තුරුපත් ගෙන මහ රෑ මැද
සක්මන් කරනා සුළඟෙහි
වැතිර හිඳිමි ගොම පොළොවෙහි
බදා වැළඳගෙන නිජබිම

මේ නිවහන හිස්ව මෙලෙස
හුරුපුරුදුද නොම අසන්න
අත ඇරීම ගැන කියන්න
එපා තවත් කවි ලියන්න!

Picture - Pamela Alderman, American, Standing in the Wind

Tuesday, November 6, 2018

විශ්වයේ ගැඹුර

මවුවරුන් සහ දරුවන් සිටින
විශ්වයම එකම වේදනාවකි

මවක නොවීමේ දුක පමණමය
මවක වීමේ දුකද බය
හුස්ම ගණන් කරමින් සිටින විට
උත්තර ධැරවය මෙනි සිත
ගිලෙන කිසිවක රසක් නොදැනෙන
වේදනා එනනත් කළ ඇසිල්ලක
අහිමි වේ යැයි දැනෙන බිය
මහමෙරට වඩා විසාලය

විශ්වයේ ගැඹුර සොයා ළත වෙන
විද්වතුනි ඇසිය යුතු මවකගෙනි එය
දරුවන් ලද සහ නොලද
මවකගේ සෙනෙහස දුකද බය
විශ්වයේ ගැඹුර පමණ සහ
ඊටත් ටිකක් වැඩිපුර!

Sunday, July 22, 2018

නිශ්ශබ්දතාව මිනීමරුවෙකිය


ඔහු මිය 'ගියේය'
ඔහු ගිය පසු කිසිවෙකු
ඇවිද ගියේ නැත
අලුත් වූ ලේ සලකුණු මත
ඔහුගේ දින සටහන් පවා
පැහැර ගත්තෙහිය ඔවුන්

විශ්වයෙහි කළු කුහරය මත
රැඳී ඇත ඔහු පා සටහන්
තාරකා එළි මෙන් පත්තු වී නිවෙයි තවමත්
වැළපුණු සංඥා එළි මෝටර් රථය මත

බොහෝ මිනිසුන් බොහෝ තැන්වල
මරදාන ගාමිණී හෝල් බොරැල්ලේ
කොටුව පිටකොටුව තුම්මුල්ලේ
වැඩකරමින් සිටින අතර - ඇවිද යන අතර
ටවුන්හෝල්වලදී ඔහුගේ හිසට වෙඩි තැබූහ ඔවුහු

මිනිසුන් කෙත්හි වපුරන කල නෙළන කල
උස් කඳු මුදුන් නිහඬව විඩාලන කල
ගංගා හීන්දෑරිව ගලායන කල
විසන්ධි කළහ ඔවුහු ඔහු, 'ඉතා පහසුව'

කෑරලුන් දහසක් කෑ ගසා ඉගිල ගියා මිස අහසට
නිශ්ශබ්දය සියලු දෙය
සියලු දෙන ඇවිද යන මහ-මඟ
මිනිසෙකු වෙඩි තබා මරා ගිය රටක
ඉනික්බිති නිශ්ශබ්දතාව..
මරණය තරං සීතලය
නිශ්ශබ්දතාව මිනීමරුවෙකිය

Picture - Joseph Zbukvic, Australian

Monday, July 9, 2018

වසන්තය, ඔව්, ආයෙම



වේදනාව මා වටා පැතිරෙන කල
සමනල්ලු ගී ගයයි තුටින්
වසන්තයේ ඡායා අතර
හිම දියැවෙයි නැවුම් හිරු කිරණ වැද
ගලවා දමා ගැඹුරු සාලුව
මිදී යමි නැවුම් දිය මත

නිදහස
පෑදි දිය යට ඇත් දළ පෑති ගල් කැට
නිදි කිරන රෑ බදුල්ලන් ප්‍රීතිව
කඳු මුදුන් හැර යන මිහිදුම

වසන්තය, ඔව්, ආයෙම

Picture - Gavin Hardcastle, https://www.fototripper.com

Monday, June 25, 2018

අවංක රාජ්‍ය නිලධාරින් ඉන්නවාද?
























  
ඕ, ඩියර් ට්‍රාන්ස්පේරන්සි ඉන්ටනැෂනල්
කොපමණ දුෂ්කරද
අවංකම රාජ්‍ය සේවකයා සෙවීම
සොරුන් සහ තක්කඩියන් අතර
ධවල පිළි හැඳි
ධවල කණකර බැඳි

අඳුරට ඇතුළු වුවහොත් ඔබ
දැනෙයි බර ඇති කඳුළක හැඩ
අන්ධකාරය අතර නොපෙනේ
අඳුරට බැහැර කළ මිනිස් ගුණ

සේවයෙන් පහ කළ මිනිසුන් අතර
තටු කපා තලා ලූ අය අතර
රජ මැතිඳු කිසිදා විවර නො කරන
දුක්ගැනවිලි පෙට්ටිය ඇතුළ
වැළපෙයි අවංක රාජ්‍ය සේවකයා
ඩිමෝට් කළ, පඩි කැපූ, වැටුප් වැඩිවීම් නොගෙවූ
ස්ථිර නොකළ අසත්‍ය චෝදනා ලා විනය පරීක්ෂණ කැඳවූ
හිඳී ඔහු සෘජුව නිසලව
උසාවියේ දිනූ, පැරදුණු, ඩිස්මිස් වූ නඩු අතර
හිඳී ඔහු හිනැහෙමින, අප්‍රකටව

කිසිදාක ඔවුන් ගැන නොලියැවේ පුවත්පත් වල
සුදු හැඳි කතුන් හා මිනිසුන් ගැන මිසෙක
කලුපාට පොරවා අඳුරට තල්ලු කළ අය අතර
වදනකුදු නොදොඩමින් හිඳී ඔහු, අප්‍රකටව

වැළකුමට සොරකම පය තියාගෙන ගියරයට
පිළිස්සුණු දෑත වණ දරාගෙන ඉක්බිතිව
සියක් තර්ජන ගර්ජන මැද
වැළපෙමින් සිනා වෙයි ඔහු, ඇය

මානව හිමිකම් නැත ඔවුන් හට
ගෙල කපා දැමුමට දිගු කළ කග මිස
වෙන කිසිදු අයිතියකුදු නැත ඔවුනට
නීතියේ සරණද රීතියේ සරණද..

නැවුණු නීති, තැලුණු නීති, නීතියේ හිඩැස්
සියල්ල අතර ගැහැට දරමින්
ජීවත් වෙයි තවමත් ඔහු නිහඬවම

සොයා ගත හැකිද ඔහු පහසුව
කවරක්ද සාක්ෂි අවංක බවට
පැසසුම් නොමැත, ගැරහුමය හැම තැන
ලිපිගොනුවල කාර්ය සටහන් විවර නැත මහජන හට
තොරතුරු පනත විවර නැත
කිරුළු ලෑමට ඔවුනට

ගල් මුල් පහර මිස
නොදරයි ඔහු කිසිවක්
මුදලට ලැදි බහුතරය ඇති රටක
සුළුතරය අතරත් සුළුතරයකි ඔහු, ඇය

නොහඳුනනයි ඔහු කිසිවෙක්,
මරණ බයෙන් ළතැවෙන 'මුත්
මරණය මෙන් නිහඬය ඔහු සටන

හොයා ගත හැකි නම් ඔවුන්
කඳුලක බරිනි; සුසුමක සරිනි!

- ෂසිකා අමාලි මුණසිංහ

Picture - http://epaper.dinamina.lk/art.asp?id=2018/06/25/pg11_2&pt=p&h=
Other Links : http://www.integrityidol.lk/

Tuesday, June 19, 2018

දුගියන් හට රත් කෙවිටෙන්

බලවතුනට රන් පෑනෙන්
දුගියන් හට රත් කෙවිටෙන්

යුක්තිය හප ගා මිරිකා
දුගියන් වෙත ගසා දමන
යුක්තිය පසිඳලනා තැන
සත්‍යය මිය ගිය දවසක
යාරා ගං ඉවුරත හිඳ
ඉකි ගසමින් මම හැඬුවෙමි

යාරා ගඟ ගලා හැලෙන
දිය කඳ පෙණ බිඳු නගමින්
හෙමි-හෙමිහිට මා පසු කොට
ගලා බසින්නට වූවා
ඉහළ වනපෙතේ මිය යන
රැහැයි ගීය පරඬැල් හා
ගසාන විත් මඳ සුළඟට මුසු වූවා
තුඟු කඳු පෙළ දෑත් යොමා
මා අමතන්නට වූවා

'පුත මේ ලොව
විනිසුරන්ද සොරුන් අතර
නැත වෙනසක්
මිනිසෙකු හට හිමි ප්‍රීතිය
ඩැහැගෙන ඉහළට නඟිනා
නරක අයද හොඳ අය'තර
පවා නොමැත කිසි වෙනසක්
එක් එක් අය යන එන මඟ
පුරවා තම තම ඔලොගුව.."

ඒ දුක්බර දින සෝකෙන්
මිරිකා වැලි අහුරු අහුරු
බෑඟිරි නැඟුවෙමි හඬ ගා
"පියාණෙනි.. මට ඕනෑ වෙනසක්
ටිකක් හොඳ ටිකක් හොඳ ටිකක් හරි හොඳ
රටක්, සතුටක්"

ඉන් පසු ඉන් පසු ඉන් පසු
සත්‍යය මිය ගිය තැන
උන් එක් උස් විනිසුරුවෙක්
රත් වූ අඬුවක මා ගෙල
සිර කොට සිර කොට සිර කොට
කුස ගින්නේ වියරු වැටුණු
කොටි දෙන වෙත විසි කෙරුවා

වෙනසක් වෙනසක් ඕනෑ
හදපත්ලෙන් මතු වී ආ
මා දුබලැති ස්වර!!
හිස් අවකාශය වෙත වැද
මැකී ගියා මැකී ගියා

"වෙනසක් ඕනෑ
වෙනසක් ඕනෑ මට"

නීල නිලැති කඳු හිස්වල
රැව් දී රැව් දී රැව් දී
රෑහි හඬින් රෑහි හඬින්
තවමත් ඇසෙනව ඒ හඬ!

Monday, June 18, 2018

ඔවුන් සතුය උණ්ඩ

අකුරු වියැළී යන ලෙස
ඔබ මා තලා දැමුවෙහිය
ලිපිගොනුවලින් මට ගසා දැමුවෙහිය
එහෙත් මිය නොගියෙමි මම
මා සොයා ගත් වංචාව
මහ පොළොව මත සපථ කොට මිස
ජීවමානත්වයෙන් ගිලිහී යාම
අසීරුය

හොරු අල්ලන අය පැමිණ
හොරුන්ගෙන් වත ගොත අසා යන හැටි බලා ඉමි
කිසිවෙක් නො අරිත් මා දොර
සිනා වීමට පවා ඔවුහු බිය වෙති
සොරු ඇල්ලීමට සිදු වේ යැයි
ඔවුහු බිය වෙති; මැලව යති

ඉතින් සකියනි ඔබ
නොවෙහිද සොරෙක්, සොරුන් සතු දේශයක
සියුමැලිය ඔබ නොවෙහිද,
මැරවරියක උපන් රට
හුස්මක්වත් වැටෙන්නට ඉඩ නොදෙනු එසේ නම්
ඔවුන් සතුය උණ්ඩ, ඔබ ගිල දැමිය හැකි

එ'රන් කොපු 'විත් සැණෙන්
මංගලාභරණයක් මෙන්
ඔබ පපුව වැළඳගෙන නිදාගන්නා විටෙක
කවි ලියන කුරුල්ලන් හට හැකිද
පණ නොගිය මිනිසෙකු වළලන්න?
බෝදිලිමෙකුට වුව හැකිද
ඉකි ගසා එක දිගට වැළපෙන්න?

- ෂසිකා අමාලි මුණසිංහ

Tuesday, May 1, 2018

ඔබ හදත් මිහිරි වෙද එපමණ


ගණ අඳුරු දිනවල
සුවපත් කරයිද කොතරම් ඔබ මා
තාරකා වැස්සක් වසින්නාක් මෙනි මැදියම
'මොකින්බර්ඩ්' කුරුල්ලෙක් ගයන්නාක් මෙන් ගීතම

ඇසෙයි ගන්ඨා නාදය - සුමිහිරිය
දොළ පහරවල සිලිසිලි - තණ බිම් මතින් හාවුන් ඉගිල යන හඬ
සීනුවක් කලඹා ගියා මෙන් - වැයෙන යුවතියක හද
ඔබ හදත් මිහිරි වෙද එපමණ
කරුණාවන්තද එය ගයන ගීතය?

Picture - Alexei Stepanovich Stepanov, Russian, 1858 - 1923, Unknown Title

Sunday, February 4, 2018

චියැංගෝවේ බිහිසුණු මතක - අසංක්ෂිප්ත පරිවර්තනය


2028.01.01

2027 වසරෙන් නික්ම 2028 වසර උදා වන තුරුද ඒ මහා භීෂණය උසුලාගෙන අපි ජීවත්වෙමින් සිටියෙමු. 2027 වසර තුළ විධායකයේත් ව්‍යවස්ථාදායකයේත් අධිකරණයේ සහ රාජ්‍ය සේවයේත් ක්‍රියා කලාපය දෙස බැලූ කල එය මහත් වූ විස්මයකි.

2028 ජනවාරි පළවැනිදා මගේ හෘද සාක්ෂිය මා මෙසේ අමතයි.

"ඔය කොපිරයිට් වැඩක් නෑ නොවැස්කා.. හ්‍යුමන් රයිට් ගැන බලන්න. හ්‍යුමන් රයිට් තියෙන සමාජයක කොපිරයිට් නිකම්ම රැකෙනවා. මිනිස්සු හොරා නොකන දවසක කොපිරයිට් විතරක් නෙමෙයි හ්‍යුමන් රයිටුත් රැකෙනවා.."

ඒත්, කොහොමද ඒක කරන්නෙ.. සාමාන්‍ය පුරවැසියෙකුට.. එහෙමත් නැත්තං නිකම්ම නිකම් මිනිහෙකුට මේ රටට තියෙන අයිතිය මොකක්ද.. මේ රට පැසවලා සැරව ගලන තුවාලයක් වගෙයි.. මිනිස්සු සැපයි සැපයි කියල ජීවත් වෙනවා.. තමන් ඉන්නෙ ගිනි හැලියක කියල තමන්ම දන්නේ නෑ.. තමන්ට කෙළවෙන කං ඒක එයාලට අදාළත් නෑ.. අනෙක් කොටස තමන්ට වෙන ඕනෑම අසාධාරණයක් කරබාගෙන දරන් ඉන්නවා.. කරුමෙ කියනවා.. බලයට ආවඩමිනුයි තමන් ආරක්සා වෙන්න හදන්නෙ.. තමන් වටා ඇති පොදු සමාජයෙ වේදනාවෙන් ඇකිළෙද්දි තව එක පිඟානක් කෝප්පයක් වුණත් කමක් නෑ තමන්ට අයිති කරගෙන සැපවත් වෙන්නයි චියැංගෝවේ පොදු ජනයා පොර කන්නෙ..

මේ රටේ කිසිවක් කරන්නට බැරි අන්න ඒ පොදු ජනයා නිසයි.. තමන් වටා තියෙන සමාජයේ සැරව ගඳට උන් කොපමනක් හැඩ ගැහිලද කිව්වොත් උන්ට ඒක දැනෙන්නෙත් නෑ.. මේ රටේ කිසි දෙයක් සුද්ද බුද්ද කරල පිළිවෙළක් කරන්න බැරි ඒ නිසයි..

නොවැස්කා ඔයා මල් වෙඩි වගේ කවි ලිව්වට වැඩක් නෑ.. එව්ව උල්කාවටත් වඩා වේගෙන් කඩා වැටෙනවා..

"ඒත් මන් ලිව්වේ මුළු හදවතින්ම.. තමන්ගෙ අම්මගෙ සොහොන ළඟදි මාංචු දාල අත් අඩංගුවට ගද්දි හදවතට ඉතිරියක් තියෙනවද.."

"වැඩක් නෑ නොවැස්කා.. නිකං බොළඳ කතා කියවන්න එපා.. මේ චියැංගෝවෙ යුක්තිය ගොඩ දැම්මෙ නෑ කවදාවත්.. ගොඩ දැම්මෙ මැරුණු/මරපු මිනිස්සුන්ගෙ සොහොන් විතරයි.."

Painting - George Inness, American, 1825 - 1894, Gray Day, Goochland, Virginia