සමුගැන්ම

සැඳෑ අහස ගිනි රතු වී
ඔබ ගිය බැව් මුමුණාවී
හී තුඩ තුඩ බිමට එවා
රුහිරු ගඟක් වපුරාවී
මඳ රැස මත ගිමන් නිවූ
යොහොඹු කුසුම නැවතේවී
සුමුදු සුවඳ මා වට කළ
සුළඟ සමඟ මුහු වේවී

නිතඹ වැටුණු මුදු කෙහෙරැළ
ඈතට පාවී යාවී
නිතර ඇසුණු නිසඟ වදන්
නිකමටවත් නෑසේවී
ආලය වෙනුවට පාළුව
මා දිය කර වැගිරේවී
කතරක මල් පිපුණ වුණත්
මා මත මල් නො පිපේවී

මා වට කර ඉතින් සොඳුර 
ගිනි කඳු පුපුරා යාවී
උණුහුම නැති හිරිකඩ මැද
ශීත සමය ගත වේවී
ඕඝය වෙනුවට මේඝය
මා වට කොට වැතිරේවී
තානය නැති කාලය මැද
හෙමිහිට වියැළී යාවී

Picture -Ron Hicks, American, The Love on the Road