ඩෑෂ්,

ඩෑෂ්, මට ඉංග්‍රීසි කතා කරන්ට ඕනෑ ය
ඔබ දෑස තුළ මා ගිලී ඇමිණී ගිය දිනෙක
හදවත කෑ ගසද්දිත් මුව ගොළු විය
නොදැන ඔබ බස
ඔබ ඉගෙන ආවෙහි ය මා හා
කතා කරන්නට සිංහල
"පුංචි ගෑණු ළමයා.."
ඔබ මිමිණී  ය මා කණට
ඔෆීසියේ සියලු දෙන
නොතැන් වන තැන් බල බල ම

ඩෑෂ්, මහ මඟ ද කඳු අතර පොත්ගුල්හි ගැවසි
සියලු ඉංග්‍රීසි වචන ගෙන
දමා ගසමි ඔබ පපුවට

ඩෑෂ්, මට ඉංග්‍රීසි කතා කරන්ට ඕනෑ ය
වැසි ගැන ඔබ කියන කවි අහන්ට ඕනෑ ය
නොතේරෙන දෑසින් මා බලා සිටිනා විට
"English is great. You wanna learn it.."
නැවත මට ඔබගෙන් ම අහන්ට ඕනෑ ය
ඔබේ දුම් බොන පෙම්වතිය ආ දින
මගේ ළය ගිනි කූරු වදිමින්
පිළිස්සුණු අයුරු
ඔබට කියන්නට මට ඕනෑ ය

ඩෑෂ් ඔබ සමුගෙන ගිය දින
අත මිරිකා කියූ කවිය
ඉංග්‍රීසියෙන් ලියන්නට ඕනෑ ය
අනේ ඩෑෂ් මට ඔබේ ඇස තුළ ගිලී යන්ට ඕනෑ ය