පාවෙල්, මේ වේදනාව අත හැර යළිත් මා ඇවිදිය යුතුය

සීතල හිම දෑත් ගල් කරන වැඩ මාවතේ
සුදු හිම කැටියක්ව
පාවාදෙන්නන් මැදින් ඇවිද යමි
තුවක්කුව පපුව මැද තියාගෙන
පාවෙල් කොර්චාර්ගින් මෙන් බලා ඉමි
බියකරු ප්‍රපාතය මැඩ ගිර නැඟ ඇවිද යමි

ප්‍රේමයට ව්‍යාජය පෑ නොහැකි අරුතක් නම් ජීවිතය
දිනුම් පැරදුම් එක තැන කැටි විය යුතුය
තා-ඕ-චිං වගේ සාමාන්‍ය මං පෙත් දිගේ ඇවිද යන කල
ජීවිතය නැවතිය යුතුද

ජීවිතය යනු විප්ලවයේ මුසාවක් නම්
කාලය එහි සැබෑ අරුත නම්
අප මළවුන්ව සදා වැතිරිය යුතුය
ව්‍යාජය තුළ රෝස මල් පිපෙන
වසන්තය නොපැතිය යුතුය
පාවෙල්, මේ වේදනාව අත හැර යළිත් මා ඇවිදිය යුතුය

Picture - Paul Gustave Fischer, Danish, 1860 - 1934, Højbro Plads, København

සියල්ල දේශපාලන ක්‍රීඩාවකි

කුඩා කෙල්ලක කුමන්ත්‍රණය කරන බව
ලෝකයට හඬ ගා කියන්නට
ලැජ්ජාවක් නැතිද අහසට

වැසිදියත් නියඟයත් අහස නම්
නිල තුරු ගොමුව මගේ බව හැබැයි
අන්ධකාරය තුළ වුවත් නැව
තාරකා එළියට ළඟයි
මඟ හොයා ගන්නව තමයි

සියලු ගල් මුල් රළ බිඳුම් මැද
විකසිතව ගලනා ගඟයි
හැඩි කළත් නිසසල විලක දිය
අහස මැද දුලනා සඳයි
ලොව මිහිර මුදු හදවත සමයි

Picture - Ryan S. Brown, American, Alone in her Thoughts

ලොව මිහිරිම කවිය ලියන්නාය ඔබ

කුඩා ටොනික් පියනක් වුව
කුඩා අතැඟිලිවලින්
කරකවමින් ඒ මේ අත
බොහෝ වේලාවක් යන තුරු
රස විඳින 'යුරු ඔබ
ම'පුත, ම'මිතුර

සිනාසෙයි තනිවම
සියුම් හඬ නඟයි තමාටම
කුඩා වස්තුවක වුව මිහිරියාව
උතුරා යයි ඔබේ හදතුර

කොතරම් චමත්කාරයක්ද ඔබ
ස්වර මාධුර්යයකි වැයෙන සිත තුළ
දසන් නැති සිනා පෙන්වා
ලොව මිහිරිම කවිය ලියන්නාය ඔබ

Picture - Alexander Averin, Russian, born 1952

Christina ♥

සූර්ය කදම්භයක් මෙන් මතකය

තණ පියලි මත දැවටෙන කල
වාසගමක්වත් නොදැන
ක්‍රිස්ටිනා මම ඔබව කොහොම නං හොයන්නද

කැග්නොසෝවට වෙලා සිලෝන් ටී බිව්ව හැටි
ළා කොළ පාට හැඩ කළ කේක් ගෙන'විත් හිනැහුණු හැටි
ආගන්තුකයා මා කියා කැෂියරයට සල්ලි ගෙවු ගැටි
මතක් වෙන කොට මොකක්දෝ අඩුවක් මගේ හිතටම දැනෙන හැටි

ග්‍රැහැම් එක්කල මහ පාරෙ උඩ පැන පැන නැටු හැටි
තොරතෝංචියක් නැතුවම කතා පොත් ගැන කතා කළ හැටි
මොහොතක් කියන්නෙත් කල්පයක් බව නිහඬව කියා දුන් හැටි
බොහෝ දුර ඇවිද 'විත් නවාතැන්පොළට ඇරලුව හැටි

අමුතුම පාට ගස් කොළන් අතරේ සන්ධ්‍යා කාලයට ගී ගයමින්
මිණිමය සිනාවක් අරන් ඈතට ඇදී ගිය සීතල සුළං අතරින්
ක්‍රිස්ටිනා කවියක් නම් ඔබ, මට ගයන්නට අවැසිය එය
මිත්‍රත්වයේ උණුසුමින් ඉතාම සරල තානයකට

@  Pâtisserie Mage Sàrl http://www.patisseriemage.ch/html/chocolat.html

අම්ම නුඹේ වැඩට ගියා

අම්ම නුඹේ වැඩට ගියා
වැඩ නිමවා එන්න ගියා
පුතුගෙ මුවේ කඳුළු තියා
කිරි මුට්ටිය ගඟේ ගියා

පුංචි පුතුට ඇඳුම් ගොඩයි
පුතුගෙ මුවට හබුන් ගොඩයි
ඇගේ පැතුම් අහස උඩයි
අම්ම නුඹේ කඳුළු ගොඩයි

ඇනුම් බැනුම් හිතට වැඩියි
යන එන මං බොරලු ගොඩයි
දස මර සෙන් හැම පරදයි
පුතුගෙ මුහුණ ඇගෙ නිවනයි

Picture - Mother And Son by Sandra Butler

ගලා එයි රැහැයි ගී වැහි

විඩාපත් මොහොතක
සිලිලාරයක් වී ගලා යයි කවි!!
ගණ කළු තුරු වදුලු අතරින්
ගලා එයි රැහැයි ගී වැහි

තුඟු කඳු මුදුන් පසු කර
ඇදී එයි හිරු රැසෙහි දිය ඇලි
වසන්තය ළඟා වන බව
තුරු පත් පවා ගයයි සියුමැලි

Picture - Wu Jingting, Chinese, 1904 - 1972