ඔවුන් සතුය උණ්ඩ

අකුරු වියැළී යන ලෙස
ඔබ මා තලා දැමුවෙහිය
ලිපිගොනුවලින් මට ගසා දැමුවෙහිය
එහෙත් මිය නොගියෙමි මම
මා සොයා ගත් වංචාව
මහ පොළොව මත සපථ කොට මිස
ජීවමානත්වයෙන් ගිලිහී යාම
අසීරුය

හොරු අල්ලන අය පැමිණ
හොරුන්ගෙන් වත ගොත අසා යන හැටි බලා ඉමි
කිසිවෙක් නො අරිත් මා දොර
සිනා වීමට පවා ඔවුහු බිය වෙති
සොරු ඇල්ලීමට සිදු වේ යැයි
ඔවුහු බිය වෙති; මැලව යති

ඉතින් සකියනි ඔබ
නොවෙහිද සොරෙක්, සොරුන් සතු දේශයක
සියුමැලිය ඔබ නොවෙහිද,
මැරවරියක උපන් රට
හුස්මක්වත් වැටෙන්නට ඉඩ නොදෙනු එසේ නම්
ඔවුන් සතුය උණ්ඩ, ඔබ ගිල දැමිය හැකි

එ'රන් කොපු 'විත් සැණෙන්
මංගලාභරණයක් මෙන්
ඔබ පපුව වැළඳගෙන නිදාගන්නා විටෙක
කවි ලියන කුරුල්ලන් හට හැකිද
පණ නොගිය මිනිසෙකු වළලන්න?
බෝදිලිමෙකුට වුව හැකිද
ඉකි ගසා එක දිගට වැළපෙන්න?

- ෂසිකා අමාලි මුණසිංහ