මිහිරිම දවස්

ටොක් ගස් වූයේ මොර ගස් සෙවණින් මෙපිට ඇළ අයිනේය. එය අපූරු එළිමහනකි. කුඩා අත්තකට නැඟ ගත්තද හාත්පසම එක හා පෙනේ.  එවන් හවස් කල අපි ටොක් අත්තක් මත එල්ලී ටොක් මොට්ටු නළළේ තලමින් සිටියෙමු. එකකට එකක් නොගැලපෙන අප දකින කල, අස්තන් ගත වන හිරු රශ්මි කදම්භයන්ගෙන් වෙළී ගත් කඳු ගැටය සුසුම් හෙළන්නාක් මෙන්; "අනේ කෙල්ලනේ! නුඹලාගේ මිහිරිම දවස්"යි මහත් ලාලාසාවෙන් යුතුවැ මුමුණනු මට දැනිණි.  එක යායට ගොයම් කපා තිබුණු වෙල් යායෙන් එපිට වූ අපූරු දොරගල සදාතන යොබ්බනයේ සුපුල මහා පුරුෂයකු මෙන් අප හා සිනාසෙන විට හැමතැනම කහට පැල්ලම් වැටුණු ගවුම් ඇඳ මොර අතු පිටින් ඔඩොක්කුවේ දමාගෙන සිටි අපි කඳුගැටය දෙස විරිත්තාගෙන බලා සිටියෙමු.

Picture - "Minarets" (2013), Jeremy Lipking, from California (b. 1975)