Monday, January 3, 2022

චියැංගෝවේ දවස් 1


'අඳුරු කාලවල යමක් ලියැවේද.. ඒ අඳුරු කාලය ගැනයි..'. එහෙම කිව්වෙ කවුද කියල මට මේ වෙලාවෙ මතක නැහැ. නෝරාගේ ඔසී ඩයරියේ ඉන්න මහන්තත්තකාර මිනිස්සු ගැන කියෙව්වාම මට හිතුණා.. චියැංගෝවේ ගෙවෙන දින ගැන මොනව හරි ලියන්න ඕනි කියල.

2022.01.01

උදේ පාන්දරම තැපැල්කරුගේ රත්තරන් සීනුව හැඬවුණා. දුවල ගිහින් බලන කොට, බලන් හිටපු රස්සාවකට ඉන්ටවීව් කෝල් කරපු ලියුමක්. ඒක බලන් හිටපු රස්සාවකට ලියුමක්.
දෙපාරක්ම ලියැවුණා. උනන්දුව වැඩිකමට.

දැන් ඉතින් ඔළුව උඩ ලේනෙක් පනිනව වගේ. වටේ සමනල්ලු ඉගිලෙනව වගේ.. ස්ට්‍රෙස්..

2022.01.02

2022 හැම දවසක්ම සැලසුම් සහගතයි. ඒක වෙනස් කරන්න කොහොමටවත් බැහැ. කොටින්ම කිව්වොත්, දුක්වෙන්නවත් ස්ට්‍රෙස් ගන්නවත් වෙලාවක් නැහැ.

ඒත් මං මේ අවුරුද්දෙ ළමා කතා පොතක් පළ කරන්නයි ඉන්නෙ. ඒකට ඕනෑ චිත්‍ර 17ක්. මුලින්ම විංගිගෙනුයි එච් ආර් ගෙනුයි අහන්න හිතුණත්.. හොඳට ගෙවන්නෙ නැතිව කාලය ඉල්ලන්න අමාරුයි.

ඉතිමම ම අඳිනවා.. ඒක හරිම විනෝදයි.
ඒත් දැන් දැන් බබා ඇහැරෙයි කියල හිතෙන අම්මෙක් නම් ඒ චිත්‍රය අඳින්නේ.., ඒකෙ කිසිම විනෝදයක් නැහැ.

ස්ට්‍රෙස්.. :))))

2022.01.03

අද උදෙන්ම රස්සාවට ගියා.
චියැංගෝවේ රජයේ දෙපාර්තමේන්තුවල ලොක්කන්ට තියෙන්නෙ පුදුමාකාර ආධිපත්‍යයක්. ඒ ආධිපත්‍යයෙන් එයාලගෙ ඔළු නැව්වල රුවල් වගෙයි පිම්බිලා තියෙන්නෙ. එයාලට පුළුවන් තමන් කැමති කැමති විදිහට මහජන මුදල් නාස්ති කරන්න.. තමන් අකැමති අයව තමන් කැමති කැමති විදිහට පීඩාවට පත්කරන්න. ඒවා ගැන හොයන්න අනිත් අයටත් වෙලාවක් නෑ.

ඉතිං සුබ අලුත් අවුරුද්දක් කියන්නත් කලියෙන්, ෂේන්යාගේත් මගෙත් මෙස වලට ආවා 2021 මුල් මාස හයේ කාර්ය සාධනය. ඒකෙ කාර්යක්ෂමතාව මදි කියල මිසිස් ජුලියානා ලියල තිබුණා. මිසිස් ට්‍රැට්වර් ඒක අනුමත කරල තිබුණා. ෂේන්යාත් මාත් මූණෙන් මූණ බලා ගත්තා. 'බෝලෙ උස්සල දුන්නම ඩෑෂ් එක ගහලනෙ' ඒක දැක්ක මිස්ටර් පීටරුත් හිනා වුණා.

මිසිස් ජුලියානාට පහුගිය දවස්වල විෂය ගැන ශ්ෂ්‍යත්වයක් ලැබිල තිබුණා. ඒක ඉතිං නිර්දේශ කළේ මිසිස් ට්‍රැට්වර්. ඒගොල්ලො ඒ තනතුරුවලට ආවෙ විෂය ගැන මොනම දැනුමක්වත් නැතුවයි. ඊටපස්සෙ ඉතිං ලොකූ පඩිගන්න ගමන් අපෙන්ම ඉගෙන ගත්තා.

මොනව කරන්නද? චියැංගෝවේ තනතුරු ලැබුණෙ වයසටයි.

වසරේ සම්පූර්ණ කරන්න ගිවිසගත්තු ඉල්ලක්ක ඔක්කොම සම්පූර්ණ කරල තියෙද්දිත්, දැනුම මදි, කාර්යක්ෂමතාව මදි වගේ දේවල් ලියල එයාල හුඟක් සතුටු වුණා.

මං කිව්වනෙ, මට දුක් වෙන්න වෙලාවක් නෑ කියල. මම ෆයිල් 59ක වැඩ කළා. ඇතතටම කිව්වොත්, ඒකට වෙලාව හොයාගන්න මට අලුත් අවුරුද්දෙ බෞද්ධ දේශනය මඟ හරින්න සිද්ධ වුණා. ඒකෙන් මුව ආවරණය ගලවල මහා පිරිසක් මැද පිරිත් වතුර බොන්න අකැමැති මට ඒකට අමුතුවෙන් හේතු කාරණා කියන්න සිද්ධ වුණේ නැහැ. මිසි ට්‍රැට්වරුත් මිසිස් ජුලියානාත් මුව ආවරණයත් ගලවල කට්ටිය මැද පිරිත් පැන් බිව්වේ, එයාලගෙ ජීවිතය සර්ව ප්‍රකාරයෙන්ම සාර්ථක වෙන්න වෙන්න ඇති.

මම හවස තීසිස් එකේ තුන්වැනි පරිච්ඡේදයේ භාෂා සංස්කරණය ඉවර කළා.

දැන් වෙලාව 7.30 යි.
කෑම අරන් යනව කඩෙන්.

2022.01.04

අද උදේ පාන්දරම ඉග්ෂූ හන්දියේදී මහා රණ්ඩුවක් ඇති වුණා. බස් එකේ කොන්දොස්තර, දුර ගමන් බසයක් නිසා ළඟ අයට බස් එකට නගින්න එපා' කිව්ව කියල, එපා කියද්දිත් බස් එකට නැඟපු කෙනෙක් පාපුවරුවේ හිටපු කොන්දොස්තරට පයින් ගැහුවා.

එයා එතැන වැටෙද්දි, තවත් මගියෙක්, කොන්දොස්තරට ගහපු මගියට ගැහුවා.

එයාගෙ ඔළුවෙන් ලේ එන්න ගත්තා.

කවුරුවත් දැනන් හිටියෙ නැහැ, අන්තිමට ගැහුවෙ කවුද කියල.
පොලිසිය ඇවිත් බස් එකයි කොන්දොස්තරයි පොලිසියට ගෙනිච්චා.

මමයි බස් එකේ හිටිය අනිත් මඟීන් ඔක්කොමයි ඉග්ෂූ හන්දියේ අතරමං වුණා.

ඉතිං එක එක්කෙනා තම තමන්ගේ ගමනාන්තයට එක එක විදි හොයාගත්තා.

එතැන හිටගෙන ඉද්දි මට දැනුණෙ, මගෙ ඔළුවයි පපුවයි හිතයි ඔක්කොම රිදෙන්නා වගෙයි. බස් ඔක්කොම තමන්ට දරා ගන්න බැරිතරං මිනිස්සු පුරවගෙන ආවා.

චියැංගෝවේ මිනිස්සු හිරවෙලා ගමන් බිමන් යනවා. වැඩට යනවා. ඒ අතරෙ තමන්ගෙ පීඩිත ජීවිතය පුපුරලා ගිහින් තම තමන්ම ගහ ගන්නවා...

මං, 'උපන් රට' කියන්නෙ 'අම්මා' වගේ කියල ඉස්කෝලෙදි ඉගෙනගත්තට, ඇත්තටම මට දැන් ඒක දැනෙන්නෙ, වතුර උගුරක්වත් තනියම බොන්න බැරි දරුවෙකු වගෙයි. හරිම අසරණයි. . ඒ දරුවව අතට අරගෙන සනසන්න මට පුළුවන්ද?

මට කරන්න පුළුවන්, එකම දෙය- මොනතරං කරදර ආවත් පුළුවන් තරං හොඳින් වැඩ කරන එක විතරමයි.

______________________

කාර්ය සාධනේ ලියපු අකාර්යක්ෂමතාව ගැන ෂේන්යා, මිසිස් ජුලියානාව ප්‍රශ්න කළා කියල, මිසිස් ජුලියානා ෂේන්යාව පේටන්ට් එකට මාරු කරනව කියල කිව්වා..

එයා ඊයේ පිරිත් පැන් බීල ප්‍රාර්ථනා කළේ එයාගෙ ජීවිතේ සාර්ථක වෙන්න කියලනේ.

___________________

'දරුවො, තරුණ කාලෙ, හොඳම කාලෙ මෙතනට කැප කරන්න එපා' කියල මගෙ හිතේ කොණක ඉඳල කවුදෝ කියන්නා වගේ මට ඇහුණා.

පවුලූෂාට මං ආදරේ නිසා, මං කවදාවත් හිතන් නෑ එයා පිඟන් හෝදන තැනක, උදුන් දල්වන තැනක වැඩ කරන්න ඕනි කියල.
පවුලූෂා කෑම කඩේක වැඩ කරන්න ඕනිද මිත්‍රවරුනි?
එයාව පාසලෙන් එළියට දැම්මෙ එයාගෙ වරදින්ද?

4 comments:

  1. සුබ අලුත් අවුරුද්දක් වේවා!

    ReplyDelete
    Replies
    1. සුබ අලුත් අවුරුද්දක් වේවා!!

      Delete
  2. අක්කා එතෝට රටින් පිටද දැං ඉන්නෙ.
    නැත්තං මේක වෙන දේසදීපංකරේකට ඈදපු ලංකාවෙ ඩයරියක්ද.

    කුතුහලය වඩවන සුළු ප්‍රශන ගොඩක් තියේ.

    ReplyDelete
    Replies
    1. :) කියවගෙන යමුකො ඔහොම..

      Delete